t Evengelie volgens Johannes 03
01Nikodemus was ain van Jeudse laaiders; hai heurde bie Farizeeërs.
02Dizzent ging op n naacht noar Jezus tou en zee: "Rabbi, ie mouten wel n leroar wezen dij bie God zulm votkomt. Doar kin wie ja nait omtou. Want as ain zokse biezundere taikens zain let as ie doun, den kin t nait aans as dat God hom helpt."
03"Denk ter goud om," zee Jezus, "as ter ain, hou den ook, inzain kin dat God t is dij macht over ales het, den mout dij eerst vannijs geboren worden."
04"Hou kin dat nou?" zegt Nikodemus. "Ain kin toch nait veur twijde moal geboren worden? En zeker nait as e old is! Hai kin toch nait veur twijde moal weer t lief van zien moeke in en den nog ais weer geboren worden?"
05"Dou der denk om," zee Jezus weer, "enkeld as n mensk deur wotter en gaist geboren wordt, kin e inzain dat God ale macht het.
06Want elk dij geboren is volgens noatuurleke gaang van zoaken, heurt bie dij noatuur. Wat geboren is volgens gaistelke gaang van zoaken, heurt bie dij Gaist.
07Ie huiven joe der haildaal nait over verboazen as k tegen joe zeg: 'Ie mouten vannijs geboren worden.'
08Wind dut wat e wil; ie heuren hom aal, mor zain dou ie hom nait. Je waiten nait woar of e heerkomt en woar of e hèngaait. Zo gaait t as je volgens gaistelke gaang van zoaken geboren worden."
09"Mor hou gaait dat den in zien waark?" vruig Nikodemus.
10 "Wát!" zee Jezus, "ie binnen leroar van Israël en ie hebben doar gain wait van?
11 Dou der denk om, k wait woar k t over heb en dat zeg k joe. k Wait ter ales van en wat k zeg is woarhaid. Mor ie willen der nait aan!
12 Ie leuven mie al nait as k t mit joe over dingen van dizze wereld heb. Hou zel ie den leuven as k t mit joe over God heb?
13 Ik kin t waiten: allenneg as je bie God heuren en bie hom votkommen, kin dat. Ik, Menskenzeun, kom bie God vot.
14 Mor t zel mie net zo vergoan as dij bronzen slaang, vrouger in woestijn. Mozes het dij destieds op n hoge poal stoken. Ik, Menskenzeun, mout ook op n hoge poal stoken worden.
15 Elk dij vertraauw in mie het, zel veur altied leven blieven.
16 Op zo'n menaaier het God zain loaten dat e van mensken holdt: zien Zeun - zien ainegste alderdeegs! - het e der hènstuurd. Elk dij vertraauw in hom het, zel nait omkommen: dij blift leven veur altied.
17 God het zien Zeun nait omdeel stuurd noar mensken tou om heur te veroordailen. Nee, om mensken te redden!
18 Doarom wordt gain mensk dij vertraauw in hom het, veroordaild. Mor wèl dat nait het, het zien vonnes al te pakken. Haar e ainegste Zeun van God mor vertraauwen mouten!
19 Wat holdt dat vonnes in? t Licht schient middenmaank mensken. Mor laiver as in t licht, leven mensken in t duustern. Den zugt gain mensk wat veur minne dingen ze doun.
20 Elk dij minne dingen dut, het ja n hekel aan t licht; hai blift ter bie vot. Aans zol e ja aldernoarst veur schandoal stoan.
21 Mor ain dij dingen dut dij t licht aal velen kinnen, zöcht t licht aal op; den kin elk zain wat of e doan het, en hou: om God t noar t zin te moaken."
22 Dou ging Jezus mit zien leerlingen noar t Judese laand. Doar bleven ze n zetje mitnkander. Hai deupte mensken doar ook.
23 Johannes was ook aan t deupen bie Enon, n dörpke stoef bie Salim. Der was doar wotter genog. Aalvot kwammen der mensken om deupt te worden.
24 Doudestieds zat Johannes nog nait vaast.
25 Leerlingen van Johannes kregen kwezzie mit n Judeeër over t zuvern.
26 Mitnkander gingen ze noar Johannes tou. "Rabbi, wait ie nog wel, dij man dij aan aanderkaant Jordaan bie joe was, doar ie dij verkloaren over oflegd hebben? Nou deupt hai ook. Mensken goan apmoal noar hom tou."
27 Johannes zee: "Je kinnen eerst echt over wat beschikken, as je t van God kregen hebben.
28 Ie wazzen der zulm getuge van, dou k zee: 'Nait ík bin Messias, k bin bloots veur hom oetstuurd.'
29 Brudegom is dij, veur wèl bruud bestemd is. Kammeroad van brudegom zet zok veur hom in en lustert of e der al aankomt. Hai is slim blied as e brudegom zeggen heurt, dat e der aankomt. En ik, zo meroakels blied vuil ik mie den ook.
30 Zo mout dat: hai gruien, ik n stapke terog.
31 Wèl van boven komt, staait boven ales. Wèl hier bie ons weg komt, heurt haildaal hier. Wat e te melden het, het allenneg doarmit van doun. Mor dij van God komt, dij gaait boven ales oet.
32 Zo ain prat over wat of e zulm zain en heurd het. Mor zien verkloaren, doar wil gainent aan.
33 En wèl der aal aan wil, geft doarmit wis aan dat je op God aankinnen.
34 Wèl deur God stuurd is, geft bloots deur wat God zulm zegt. Hai geft hom ja zien Gaist. En dat ook nait zo'n klaain beetje!
35 Voader het zien Zeun ale macht overdroagen, zo wies is e mit hom.
36 Wèl vertraauw in dij Zeun het, leeft veur aiweg en altied. Dat geldt nait veur wèl nait noar hom lustern wil. Dij blift zitten mit Gods grammiedeghaid."
|